I flotadôrs (par francês draveurs) a jerin chei oms che a vuidavin i troncs tai flums, di mût di puartâ indenant un convoi di arbui taiâts. Lis primis seis in Canadà a jerin di regule furnidis di aghe, di piçulis dimensions e instaladis no lontanis dai boscs dulà che i oms a tiravin jù i arbui. Plui indenant tal timp, cu la instalazion des seis plui injù dal flum, i flotadôrs a vevin di vuidâ i troncs par mieç dal flotament di chescj ultins sul pêl de aghe.
In chei bocons plui amplis dal flum, i flotadôrs a metevin adun i troncs par fâ çatis di len; ma se il flum al jere stret o intorteât, o se un ostacul al inderedave il lôr lavôr, a scugnivin disfâ lis çatis di len, par dopo puartâ indenant i troncs un daûr di chel altri. Il lavôr al tacave par solit di Sierade cul meti sù di un campament tal bosc, dulà che i oms a levin a stâ par podê scomençâ a tirâ jù i arbui. A puartavin i troncs ad ôr dal flum cul jutori dai bûs o dai cjavai, e li a ingrumavin i troncs. Di Vierte a tacavin il traspuart dai troncs tal flum; il compit dai flotadôrs al jere chel di garantî che i troncs a flotassin jù pal flum cence impediment.
Pal ordenari l’ecuipaç al jere fat di dôs scuadris di oms. I plui snei a vignivin assegnâts al puest avanzât: se a viodevin un ingorc, a vevin di risolvilu daurman, prime che e capitàs une trucade a cjadene. I oms di cheste prime scuadre a vevin di jessi une vore fuarts intal fisic: al è dibant precisâ che il lôr mistîr al jere un grum pericolôs. La seconde scuadre, tignude indaûr, e jere fate di oms mancul esperts che a vevin di tignî sù la brene: a scugnivin sburtâ indenant i troncs che a jerin restâts indaûr, chei mancjâts de prime scuadre. Altris oms a lavoravin su la rive dal flum, sburtant indenant ancje lôr i troncs sparniçâts cul jutori di un pâl di luç.
Il mistîr dal flotadôr al finì tai agns novante par vie dal traspuart stradâl e des leçs ambientâls.