Romualt al nassè tal secul X a Ravene. Di une famee ilustre e principescje, al menà in zoventût une vite plene di stravizis, tipiche de sô cundizion. Obleât di so pari a fâ di secont intun duel, al fo testemoni dal copament di un so parint. Conturbât in mût profont di chest acjadiment, al decidè di espiâ il pecjât dal pari te abazie benedetine di Sant Apolinâr a Classe, dongje di Ravene. Intant de sô permanence di cuarante dîs, i comparì dôs voltis in vision il vescul martar che i siei rescj a polsin alì. Chest fat lu sburtà a ufrîsi dal dut a Diu. Tirât dentri te congregazion, al lusì tant che model di virtût monastiche e di assetisim ma, di chê strade, cheste sô condote i valè la asse e lis persecuzions de bande dai confradis, che, cjapâts dal spirt di chest mont, no jerin puartâts a miorâ i lôr ûs.
Seneôs di une vite plui perfete, Romualt al lassè la abazie dopo trê agns; al lè li dal eremite Marin, che al viveve su la lagune dongje di Vignesie. Al cognossè in chel periodi ancje l’abât Guarin dal munistîr di Sant Michêl a Cuxa, situât da pît de mont Canigou, tai Pireneus orientâi. Romualt, dutun cun Marin e cul ex dôs venezian Pieri Orseolo, si sistemà no lontan di chel munistîr, dantsi vie a di un assetisim rigorôs. Al fo alì che al madressè in lui il concet de vite eremitiche, poiade di une comunitât sot la vuide di un superiôr.
Dopo tornât in Italie, si impegnà ad implen a riformâ e fondâ munistîrs e eremitaçs, li che e sflorive la vite eremitiche. La innomine di Romualt tant che eremite ardint e rivà fintremai al imperadôr Oton III, che lu nomenà abât a Classe, incargantlu di riformâ il munistîr. Cun dut achel, dopo un an, Romualt al rinunzià al so compit. Si invià bande de abazie di Mont di Cassin, là che al cognossè un munic di non Benedet, ancje lui seneôs di menâ une vite eremitiche. Chest ultin lu menà intal so ritîr daprûf dai palûts dal flum Po, dongje di Ravene, intun lûc clamât Pereum.
La tradizion e conte che, in timp di un so pelegrinaç tai munistîrs, Romualt si indurmidì dongje de citât di Areç, in Toscane. Al viodè in sium i siei dissepui, vistûts di blanc, che a levin sù pe scjale di Jacop dret in cîl. Al interpretà il sium tant che segnâl di Diu e, par la cuâl, al decidè di fondâ un eremitaç in chel lûc. Biel che al leve li dal vescul in mût di domandâi il permes di meti in vore il so progjet, al cjatà il paron de valade, che i contà di vê za fat il stes sium e che, seneôs di viodilu inverât, al veve intenzion di dâur vie ai munics il teren intîr pe costruzion di un munistîr. Il paron dal teren si clamave Maldulus. Tant che segn di gratitudin tai siei confronts, i meterin non al lûc Campus Malduli (Cjamp di Maldulus), dontri che i munics di alì a forin clamâts camaldulenses, valadì camaldolês.
Tirant dongje i eremitis in comunitâts piçulis, e fasint jentrâ te lôr vite une regule fisse e la ubidience al superiôr, Romualt al deventà il rinovadôr de vite eremitiche te Glesie ocidentâl. Chest al sucedè intun periodi cuant che pôcs abâts, che no rispietavin cun fedeltât la regule di sant Benedet, insiemi cun pôcs munics o ancje di bessôi, a menavin une vite monastiche massimementri rilassade, plui interessâts che a forin ai lôr munistîrs che no a puartâju indenant, o sedi cuant che la osservance monastiche e jere in declin. In chel moment, Romualt, midiant de misericordie di Diu, si palesà al mont tant che il soreli fra i nûi. Al metè adun chest stamp maraveôs di eremitis in Toscane, su lis pichis dai Apenins, framieç di boscs bondants di peçs, alts e simpriverts, tal sant eremitaç dal cjamp di Maldulus. Romualt al murì tal an 1027.