Matieu VIII,1-13: Cuant che al vignì jù de mont, une vore di int i lè daûrji. E ve che un levrôs i va dongje e si bute in zenoglon denant di lui disint: «Signôr, se propit tu vuelis, tu puedis smondeâmi». Alore al slungjà la man e lu tocjà disint: «Lu vuei, smondeiti». E la levre e scomparì dal moment. I disè alore Jesù: «Sta atent di no dîlu a di nissun. Ma va, fasiti viodi dal predi e puarte l’ufierte che Mosè al à ordenade come testemoneance par lôr». Jentrât in Cafarnau, i lè dongje un centurion che lu suplicave disint: «Signôr, il gno servidôr al è distirât in cjase paralizât e al patìs di murî». E Jesù a lui: «Varessio jo di vignî a vuarîlu?». Il centurion i rispuindè: «Signôr, no merti che tu vegnis cjase mê; ma dîs dome une peraule e il gno servidôr al vuarissarà. Di fat ancje jo, seben che o soi dipendent, o ài soldâts sot di me; se i dîs a di un: Va, chel al va; a di un altri: Ven, chel al ven; o al gno servidôr: Fâs chest, lui lu fâs». Sintint cussì, Jesù al restà maraveât e ur disè a di chei che i levin daûrji: «Us al dîs in veretât: no ài mai cjatât in Israel nissun che al ves tante fede. Us dîs ancje che une vore di lôr a vignaran di là che al jeve il soreli e di là che al va a mont e si sentaran in taule cun Abram, cun Isac e cun Jacop tal ream dai cîi; cu la cuâl che i fîs dal ream a saran parâts fûr tal scûr, là che al sarà dut un vaî e un crustâ di dincj». Po i disè al centurion: «Va, che al sedi fat daûr che tu âs crodût». E juste in chel il servidôr al dè di ca.