Zuan II,1-11: Tre dîs dopo a faserin une gnoce a Cane di Galilee, e e jere ancje la mari di Jesù. A invidarin a gnocis ancje Jesù, cui siei dissepui. Vignût a mancjâ il vin, la mari di Jesù i dîs: «A son restâts cence vin». I dîs Jesù: «Ce vuelistu di me, femine? La mê ore no je ancjemò rivade». Sô mari ur dîs ai servidôrs: «Fasêt dut ce che us disarà». A jerin li sîs pilis di piere pes abluzions dai Judeus, che a tignivin fin a un etolitri l’une. Ur dîs Jesù: «Jemplait lis pilis di aghe». E lis jemplarin avuâl dal ôr. Po ur dîs: «Cumò traêt e puartait al mestri di taule». Lôr int puartarin. A pene che il mestri di taule al cerçà l’aghe deventade vin (lui nol saveve dontri che e vignive, ma ben lu savevin i servidôrs che a vevin trate l’aghe), al clame il nuviç e i dîs: «Ducj a tirin fûr prime il vin bon e po, cuant che si è legris, chel plui scart. Tu invezit tu âs tignût cont il vin bon fin cumò». Chest inizi dai spiei Jesù lu fasè in Cane di Galilee e al pandè la sô glorie e i siei dissepui a croderin in lui.
Tal 2026: ai 18 di Zenâr
Tal 2027: ai 17 di Zenâr
Tal 2028: ai 16 di Zenâr
Tal 2029: ai 14 di Zenâr