VIII. La stue [audio]. — Copari Michêl, za che tu sês in pîs, fâs il plasê di tirâ-dongje chê mostre di puarte; se no, chês femenutis culì si sgrisùlin di frêt e Di’ uardi che no ur vegni une ponte! Sintît ancje cheste: chealtre dì siôr Noni Tabarìn, ch’o sin stâz compagns di banc a scuele publiche, mi à mandât da l’Americhe quatri carantans pe glesie: cussì ’o varès pensât di fâ meti une biele stue, culì in bande, se ogni famèe — di chês ch’a vègnin in glesie, si capìs — si impegnàs di puartâ, in volte, un braz di lens o un fassùt di vinceis ogni fieste. Si tratares di un quindis fiestis ad an, che fûr dai mês plui crûz nol covente fâ fûc. Une robe gnove — nomo? — adatade al fisic dilicât di chê int di cumò. Parcè che mê comari Tunine dal Fari e gno cusìn Pierot Raspan e ’Sèpil Brumat e la vedue di Tencje mi àn vût dit che lôr a’ vignaressin di plui in glesie se no fos chê glazzere ch’e je, massime quan’che pre’ Scjefin al distire un pôc masse il so sermon. Magari gno cusìn Pierot il dì di San Silvestri o di San Valantin al sta, come nuje, quatri oris fêr te criure sul marcjât di Gargagnà di ’Sot, s’al è ogni pôc di rizîr di nemai. Magari Tunine dal Fari, il prin viaz ch’e fâs di buinore a urî aghe sul poz, se si cjate cu la Catinate dal Moro, almancul miez’ore di badajade la pete dal sigûr, cui pîs sul lastron di glazze ch’al è lì atôr. Magari Brumat al risist mieze zornade, tes primis zilugnadis di atòm, a tignî amenz lis viscjadis ch’al à tindudis te pinade dal Blancutin. Il pericul di cjapâ la palmonite al è dome in glesie, dulà che no cole la zilugne, dulà che no sofle la buere, dulà che la glazze no s’imbrucjs nancje te piere da l’aghesante, ch’e je simpri distaponade.
Poben, ’o provarai a meti-sù la stue; e la metarai cassù insomp, cu la speranze che, tratansi di sintî il clip, ancje chei fantaz ch’a son soliz di fermâsi subìte dentri de puarte, a’ vebin di scomenzâ a vignî plui indenant. Se no ju tire il vanzeli pridicjât dal predi, ju tirarà il borez.
Tù, Martin di Sante, che tu sês un bon cristian (quan’che ti salte), tu vignarâs a fâmi il cjamìn: za di cheste stagjon no tu âs altris lavôrs di muridôr pes mans. Al ûl dî che il bocâl par umiliâ l’agadorie no ti mancjarà: che jo ’o sai di ce pît che tu vâs zuet. Chel fregul di matereâl ch’al ti coventarà, al sarà culì màrtars cu ven; ’o mi soi bielzà intindût cul mulinâr che lu meni dongje.
Cjo’ mo: a momenz mi dismenteavi di visâus che doman ’o varìn la messe es vot e mieze; e dopomisdì nuje, parcè che te plêf ’e je la novene di San Blâs. Cussì ancje lunis, ch’e je la fieste, lis funzions a’ saran dome lajù. Al dîs il plevan che, di cheste stagjon, un quart d’ore di strade al va benon.
E cun cheste us doi la buine sere.