Il cuel dal Cjistiel si jeve tal mieç di Udin, visibil di ducj i cjantons de citât: al è une presince imponente, isolade, alt cirche 30 metris, cuntune base di 200 metris di diametri. Cheste alture e domine il paisaç urban e di secui e je un dai simbui plui innomenâts, no dome de citât, ma di dute la regjon. Il cuel al à ispiradis une vore di liendis, contis popolârs e ipotesis apassionantis che dilunc dal timp no àn mancjât di stiçâ la curiositât dai studiôs. Lis ultimis indagjins archeologjichis e gjeoarcheologjichis (2020-2022) a àn sclaride la sô nature: e je une struture fate dute dal om midiant strâts di glerie e arzile metûts un sore di chel altri, stabilizâts cun struturis di len. Un rilêf monumentâl, che si pense che al contegni tra i 400.000 e i 450.000 metris cubics di sediments. Daûr des datazions disponibilis, al à di jessi stât fat sù a cjaval tra la Ete dal Bronç Medi e chê dal Bronç Resint (cirche 1400-1300 p.d.C.). Al somee che la costruzion di chest cuel cetant imponent e sedi stade un progjet unitari: il materiâl par fâ sù la culinute si lu varès cjatât sgjavant tal spazi li che vuê al è Zardin Grant, gjenerant intal stes timp un sfuei artificiâl di aghe a servizi dal centri abitât protostoric di Udin. Une opare planificade che e garantive un pont strategjic di osservazion e di control dal teritori, fate sù par dâ une prove concrete de potence de comunitât. — Museu furlan di storie naturâl.