Sot dal Palaç Mantica al è stât cjatât un toc piçul de roste origjinarie, che si è mantignût par une altece tra i 80 e i 120 centimetris, de bande sudorientâl dal cuel dal Cjistiel. Ancje se i dâts che o vin a son pôcs, te ete che e va dal Bronç Medi al Resint (secui XIV-XIII p.d.C.) la cente di difese di Udin e veve za di vê une grandece monumentâl. Il sgjâf archeologjic al à evidenziât che la costruzion e je stade fate in trê moments diferents, simpri cun grande braùre tecniche. La part centrâl origjinarie dal teraplen e je stade slargjade une prime volte midiant de tecniche de «tiere armade»: grandis cassis di len plenis di grave, pantan arzilôs e cogui disponûts sui nivei plui alts a scachiere, cualchi volte cun elements plui piçui voltâts di 45°. Struturis di len intieradis a funzionavin tant che barieris di stabilizazion e a garantivin la soliditât e la coesion interne de costruzion. Tes fasis avanzadis de costruzion dal teraplen si dopravin struturis plui lizeris: armaduris di len fatis cun scjaipulis grandis jempladis di materiâi contignûts dentri di sacs o di zeis. Fasint une stime, se ogni dì 100 operaris a vessin movût cirche 1 metri cubic di tiere ognidun, i varessin metût tra i 2 agns e mieç e i 4 par finî il lavôr. — Museu furlan di storie naturâl.