Daûr dai risultâts des ricercjis archeologjichis, l'abitât protostoric di Udin si slargjave bande Sud e Ovest dal cuel di Udin, dal atuâl Marcjât Vieri (vie Mercatovecchio) fin al ex ospedâl civîl, e dal Borc di Sant Bortolomiu (vie Manin) fin ae glesie di Sant Francesc. Cuntune continuitât insediative di cirche mil agns, o sedi de Ete dal Bronç Medi fin al principi de seconde Ete dal Fier (1500-500 p.d.C. cirche), al è l'insediament fortificât plui grant e complès de protostorie furlane. Fat sù suntune culinute, al veve une estension di cirche 20 etars – di cinc a dîs voltis plui grant dai centris abitâts de stesse ete, logâts te plane – e al jere delimitât di un teraplen e di un fossâl. I rescj si conservin a pocje profonditât, par vie de posizion plui elevade e ben drenade de alture, che e à parât la aree des aluvions, ma che ancje, dilunc dal timp, e à permetût la erosion dai nivei protostorics che po dopo a son stâts modificâts de urbanizazion medievâl. Tra lis struturis che a son stadis scuviertis a son fuessis di scaric, busis di pâl e poçuts, materiâi di crep, imprescj pal fûs, pês di telâr, rescj di mûrs di cjanis e paviments di cuet che nus dan la idee de vite di cjase. Fin cumò a son stadis cjatadis dôs abitazions. Une cjase e va indaûr ae Ete dal Bronç Resint, e je sot dal Palaç Mantica, cun plante retangolâr, lis parêts di len e un fogolâr, ristruturâts plui voltis; une altre cjase e je te place dai Lens (place Venerio), e à une stanzie dipuesit tal plan in tiere par mantignî lis risiervis alimentârs, e e je stade distrute di un fûc a cjaval dai secui VI e V p.d.C. Sot dal Palaç Dorta, invezit, e je stade cjatade fûr une aree artesanâl par fondi piçui ogjets di bronç, ative de Ete dal Bronç Medi fin ae prime Ete dal Fier. No son stadis identificadis cun sigurece necropolis, ma cualchi ogjet, par esempli dôs fiubis cjatadis in Zardin Grant (place Prin di Mai) e a Planis e une manarie cjatade in Viâl Ongjarie, a somearessin peadis a contescj funeraris de Ete dal Fier, vuê pierdûts. — Museu furlan di storie naturâl.