Daûr de tradizion popolâr, il cuel dal Cjistiel di Udin al sarès stât fat sù dai soldâts di Atile par permetii di viodi Aquilee che e brusave. Te Ete dal Bronç Antîc, dilunc di une fasse largje cirche 10 chilometris, tra la Tor e il Tiliment, te Alte planure furlane a jerin desenis di mutaris e cualchi abitazion fortificade – i cjastelîrs. Lis mutaris a son culinutis artificiâls di 25-30 metris di diametri, altis cirche 6,5-7 metris: vuê a 'nt son restadis pocjis. A jerin lis sepulturis di oms impuartants des comunitâts dal Bronç Antîc e a van indaûr al principi dal II mileni p.d.C., o sedi, prime dai cjastelîrs. In cualchi câs, chescj tumui a àn mantignude la lôr impuartance par secui, cun significâts e funzions diferentis: tra i secui XIX e XII p.d.C. no vevin plui dome un rûl funerari, ma a jerin ancje simbul dal control teritoriâl des comunitâts che ju vevin fats sù, funzion che dopo e sarà dai centris abitâts fortificâts. In plui, a jerin lûcs di incuintri e di celebrazion, ponts di osservazion e di riferiment intai percors di scambi. I cjastelîrs furlans si son disvilupâts subit dopo e si son difondûts massime te Ete dal Bronç Medi. Une ecezion e je il cjastelîr di Sedean dulà che, dentri dal teraplen, a son stadis scuviertis cinc sepulturis che si puedin datâ tra il 1900 e il 1600 p.d.C. Il disvilup plen dai cjastelîrs al va indaûr ae Ete dal Bronç Medi cu la fondazion dai cjastelîrs di Udin, Varian di Basilian, Gjalarian di Listize e Savalons di Merêt di Tombe. In etis sucessivis, a son stâts fats sù altris cjastelîrs dilunc de fasse des risultivis e dacîs dai flums. Tra la fin dal Bronç Medi e il principi dal Bronç Resint (secui XIV-XIII p.d.C.) si son difondûts in maniere capilâr in dute la Basse planure furlane. Al somee che la difusion dai cjastelîrs e vedi tignût cont de presince des mutaris antighis, che dispès a jerin intune posizion intermedie tra un cjastelîr e chel altri, cuasi a marcâ i confins tra i teritoris des diviersis comunitâts. Di cemût che si son difondûts i centris abitâts, al somearès che ogni grup al ves une cussience clare – salacor ancje rispiet – des areis di pertinence di ognidun; te fase plui antighe dal fenomen (Bronç Medi), lis distancis si son stabilizadis in maniere regolâr tra i 8 e i 10 chilometris. — Museu furlan di storie naturâl.