La interpretazion plui resinte dai dâts gjeoarcheologjics che a integnin il cuel dal Cjistiel di Udin a àn palesâts i aspiets plui impuartants di un progjet che al è stât planificât in mût straordenari: pe sô costruzion e je coventade la cooperazion organizade di dute interie la comunitât. Par modelâ cheste alture imponente – une struture a forme di tronc di coni, cun rivis a teracis – a son stâts puartâts dongje tra i 400.000 e i 450.000 metris cubics di sediments, rigjavâts prime di dut de aree che vuê e corispuint a place Prin di Mai (Zardin Grant). Lis dimensions monumentâls e la complessitât de opare a evidenziin une planificazion detaiade des fasis di costruzion, l'ûs di tecnichis ben cognossudis e di operaris specializâts impegnâts par tant timp. Daûr des stimis che o rivìn a fâ vuê, se a fossin stâts impleâts cun continuitât 100 operaris, la costruzion e sarès durade cirche 10-12 agns; cun 300 operaris, 3-4 agns; invezit, cun 500 si varès podût finîle in pôc plui di 2 agns, tra i 26 e i 30 mês. Tignint cont des dimensions piçulis des comunitâts furlanis te Ete dal Bronç – ognidune e veve cualchi centenâr di personis – al è pussibil che par costruî il cuel dal Cjistiel di Udin a vedin contribuît operaris rivâts dai insediaments dongje. Intune societât preindustriâl, che e doprave dome imprescj di len, di cuar e zeis, si pense che ogni operari al podès movi cirche 1 metri cubic di tiere in dì. Chest dât teoric al è stât provât ancje in timps resints: tal 1700, par bonificâ il sfuei che al jere tal spazi dal Zardin Grant (place Prin di Mai), 48 operaris cun palis di fier a son stâts 32 dîs par movi 1500 metris cubics di tiere, cuntune medie in dì a cjâf une vore simile di chê stimade pe ete protostoriche. — Museu furlan di storie naturâl.