III. Il pignarûl [audio]. — Ce uelial dî che usgnot ’o seis cussì in pôs? Ahà, il pignarûl! Cumò m’impensi ch’o ài lampât, vignìnt in glesie, Toni Sclese ch’al lave-jù cun tun medîli su la spale, plui lunc des predicjs di pre Scjefin. Dait un cuc ta l’arie, cumò ch’o tornais a cjase: nissune maravèe che al vebi alzât di pês il jubâl a qualchidun, chel temul, par fâ il fugareli plui biel dal circondari. E la zoventût ’e sarà atôr a brascjam, a vincèis, a fassùz di soriâl... Si sa po’! Lis tradizions a’ van rispietadis, massime chês che no distùrbin la cussienze e che no oblèin a scrusignâ te scovazzere da l’anemate. Veiso fat il presepio sot il seglâr? Veiso metût chel tâl ch’al fâs la polente, chel altri ch’al mene la pigne, chê femenute ch’e va a urî aghe cul buinz, chel ch’al rustìs lis buèriis, chel vieli ch’al sune la bulziche? E il mulin cu la muele ch’e côr sun tun riul di stagnole? E il cjscjel cui manigolz ch’a fàsin la uàite cul spizzot su la spale? E cui sa se, par cuminazion, si seis visâz di meti, in qualchi cjantonut, ancje la Madone cul Bambin e Sant Josef? Parcè che chei a’ son i ultins e si sta pôc a dismenteâsi di lôr. E veiso santificât il Nadâl cun tun biel dindi? E la gnot dal prin dal an cun tune biele cjoche? E la domenie di miez cun tun fregul di ghiringhel e quatri bòlzars in famèe? Al mi à dit Tite Brucje che nol saveve cemût parâsi, parvìe che lu vevin invidât cu l’armoniche in siet-vot cjasis, chê sere stesse: puare anime, ce vitis di fâj fâ!
Di’ po, Masut, tù che tu sês inscuelât e che tu vadis ogni dì a lei il sfuei ta l’ostarie di Baduscli, no ese vere che, ancje chest’an, sot fiestis i gjornai a’ jerin plens di robarìis, di imbrojèz, di trucs, di sgrifignamenz? Cjoh, la zoventût ’e à dibisugne di carantans, par rispietâ lis tradizions! ’O viodareis di chì indenant, sul carnevâl, se nol tocjarà di cori a cjase prin di gnot, par no cjatâ su la strade qualchidun cul fazzolet su la muse e un sclizzot di fiâr in man... a cirî la caritât! Simpri parvìe des tradizions.
Sintît mo’: jo ’o soi di chei di une volte, si lu sa; ma ’o soi a dius che, co si jere fantaz noaltris, si mantignivin lis usanzis miôr di cumò; ancje tantis bielis usanzis che in dì di uê si son bielzà distudadis. Ma nol coventave ne disvuedâ i gjalinârs dal prossim, ne spietâ la int su lis stradis scuris, ne riscjâ di fâ qualchi setemane sul taulaz, par amôr des usanzis. E i pignarui si ju faseve granc’ e biei e fis, cence saltâ il rosari. Nomo, Jacum? Nomo, Blasùt? Nomo, Checusse? Vualtris ’o podeis dîlu, ’o podeis fâmi di testemonis, se no dîs il vêr.
Doman, messe cjantade cassù, come il solit! O speri che su l’albe des undis nol sei plui nissun pignarûl di impijâ.
E cun cheste us doi la buine sere.