Sant Zorç de Richinvelde (loc. San Zors ['Sors] da la Richinvelda). Il non di Sant Zorç lu cjatìn nomenât intai documents antîcs la prime volte dome inte Ete di Mieç (secul XII); dut câs si pues pensâ che cualchi lûc abitât in cheste zone al esistès za inte ete romane; su la rive gjestre dal Tiliment si veve une strade, fate sù, dal sigûr, dai militârs, che di Concuardie e lave inviers il nord: si clamave via Julia o Germanica. In chest teritori si ve une vore di bataiis e bataicis, vie par dut l'arc de storie, fintremai ae epuche di Napoleon: chest fat lu causave sore il dut la presince, jenfri Dograve e Turide, di un vât pluitost facil traviers dal nestri flum maiôr. Intune des bataiis al fo copât il Patriarcje Beltram di Saint-Geniès, rivât intal Friûl de native Ocitanie intal 1334; tal 1350 i soldâts di ciertis fameis de nobiltât furlane a assaltarin il Patriarcje juste inte campagne di Sant Zorç e lu maçarin; la reson di chest fat e larès viodude tal puartament di Beltram masse favorevul a Udin, sede dal Patriarcjât, cuintri altris citâts e cjiscjei: insumis, chê part de nobiltât e diseve che il Patriarcje nol jere imparziâl. Sant Zorç al patì par dibot dutis lis invasions che a rivarin di soreli jevât: chês dai Ongjars (intai agns 893, 901, 902, 924, 953), e chês dai Turcs, cui Slâfs islamizâts (intai agns dal 1478 al 1499). Si sa ancje di une invasion di un trop di lôfs sul finî dal secul XVI! Dal 1420 (an dal passaç di une grande part dal Friûl intes mans di Vignesie) indenant, la storie di Sant Zorç e coincît cun chê dal Friûl centrâl e ocidentâl. Intal 1797 Napoleon, ocupade e scancelade la Republiche di Vignesie, lant inviers di Udin e oltri, al passà il Tiliment juste dongje di Sant Zorç, jenfri Dograve e Turide-Rivis. La prime citazion dal paîs tun document si le ve intal an 1179, cu l'espression latine Plebem Sancti Georgei, par ricuardâ il princip cristian di Capadocie, martar sot Dioclezian intal an 303. Il non di Domanins (che nol è mai stât voltât par talian) al è un prediâl, divignût di Daminius: lu cjatìn la prime volte intal 1204 cu la forme in villa Domanisii. Ancje il non di Provesan al è un prediâl, riferît a di un ciert Publicius; al è nomenât intal 1140 cu la peraule Provesanum. Raussêt (prime citazion intal 1204) al è un coletîf di plantis: al rive di rausea, la cjane; aduncje, «cjanêt». Poç, dal latin puteus, al è documentât fintremai dal 1190. Dograve (si cjate la forme Aurava intal 1204) al diven fuarsit di un vocabul prelatin aur par «aghe». Cose al à un non di divignince no cognossude; lu cjatìn za intal 1164 inte forme de Cosa. Al reste di dî alc in cont di Richinvelde: al è dal sigûr un non di divignince gjermaniche, che par lui si proponin plusôrs etimologjis; la plui inmediade e somee chê che e mutive cheste vôs sicu «bosc» (wald) o «cjamp» (feld) di Arichis; Arichis al jere il non di un longobart. Sot l'an 1350 o cjatìn la citazion Arichinvelt. — Agnul di Spere, 2004.