L'ordin dai camaldolês al nas sul tacâ dal secul decim prin, tor dal an 1012. Il fondadôr al è sant Romualt, un munic origjinari di Ravene che al vûl riformâ la vite monastiche dal so timp. Chel al ricêf in don un teren tra lis monts dai Apenins in Toscane, intun lûc di non Campus Malduli (Cjamp di Maldulus). Di chest non latin al ven chel talian Camaldoli, che al devente il centri principâl dal ordin. Vuê i camaldolês a fasin part de grande confederazion dai benedetins.
La novitât plui impuartante di chest ordin e je la presince di doi stîi di vite diferents tal stes puest. Tal munistîr, lozât plui in bas te valade, a vivin i munics cenobitis. Chescj ultins a fasin une vite comune: a mangjin insiemi, a lavorin insiemi e a prein te grande glesie. Plui in alt, su la mont, si cjate invezit l'eremitaç, dulà che a vivin i eremitis che a passin lis lôr zornadis in cjasutis separadis, clamadis celis. I eremitis a cirin la solitudin e il cidin par podê dedicâsi ad in plen ae preiere e ae meditazion. Fin de antichitât chescj munics a àn un leam cu la nature e cul bosc. Par secui a viodin di plantâ e di curâ i arbui torator dai lôr munistîrs. La lôr monture tradizionâl e je blancje, formade di une tuniche e di un tabâr cu la cape.
La regule di sant Romualt: Sentiti inte tô cele come tal paradîs. Butiti daûr schene il mont intîr; parilu vie de memorie. Sta atent ai tiei pinsîrs, cussì come il bon pescjadôr che al sta atent ai pes. Une strade tai salms: no sta distacâtindi mai. Se no tu puedis dut, stant che tu sês vignût achì jemplât di un fervôr fresc, cîr di cjantâ il salteri tal spirt e di capîlu tal cjâf, un pôc ca e un pôc là; e co la ment si dispiert biel che tu sês daûr a lei, no sta molâ, ma spessee di coreziti, cirint di capî. Metiti, prin di dut, in presince di Diu cun timôr e cun tremôr, istès di chel che al sta sot dai vôi dal imperadôr. Nichilissiti dal dut e, content de gracie di Diu, sta sentât come il poleçut che al cerce dome ce che la mari i puarte di mangjâ.
Nessun commento:
Posta un commento