Luche II,42-52: Cuant che al rivà a dodis agns, i siei a lerin sù a Jerusalem, seont l’usance de fieste. Passâts chei dîs, intant che lôr a tornavin indaûr, il frut al restà a Jerusalem, cence che i siei gjenitôrs si inacuarzessin. Crodint che al fos te comitive, a faserin une zornade interie di strade, e lu ciririn fra i parincj e i cognossints. Stant che no lu cjatavin, a tornarin a cirîlu a Jerusalem. E al sucedè che lu cjatarin dopo trê dîs, tal templi, sentât framieç dai dotôrs, dut intent a scoltâju e a fâur domandis. Ducj chei che lu scoltavin si maraveavin de sô inteligjence e des sôs rispuestis. Viodintlu, a restarin scaturîts e sô mari i disè: «Fi, parcè mo nus âstu fate cheste? Ve, to pari e jo, spasemâts, o levin a cirîti!». Ma lui ur rispuindè: «Parcè mi ciriviso? No saveviso che jo o scuen stâ daûr a lis robis di gno Pari?». Lôr però no capirin ce che ur veve dit. Alore al lè jù cun lôr e al tornà a Nazaret, e al stave sot di lôr. Sô mari e tignive cont di dutis chestis robis dentri dal so cûr. E Jesù al cresseve in sapience, in etât e in gracie denant di Diu e denant dai oms.