DOMINE JESU, SUSCIPE SPIRITUM MEUM
Signôr Jesù, cjol la mê anime
In chei dîs, Stiefin, incolm di gracie e di virtût, al faseve miracui e spiei di chei grancj framieç dal popul. Alore un trop de sinagoghe, che ur disevin dai «sfrancjâts», int di Cirene, di Alessandrie e altris de Cilicie e de Asie si meterin di mieç e a scomençarin a contindi cun Stiefin. Ma no rivarin adore di tignîi teste a la sapience e al Spirt che lu faseve fevelâ. Sintintlu, ur vignive sù la rabie e a crustavin i dincj cuintri di Stiefin. Plen di Spirtu Sant, lui al cjalà sù fis viers il cîl e al viodè la glorie di Diu e Jesù in pîts a la sô diestre. Alore al disè: «O viôt i cîi spalancâts e il Fi dal om in pîts a la diestre di Diu». Petant grancj berlis, si stroparin lis orelis e si butarin intor di lui; lu sburtarin fûr de citât e si meterin a clapadâlu. I testemonis a poiarin i lôr vistîts dapît di un zovin di non Saul. E intant che lu claponavin, Stiefin al preave cussì: «Signôr Jesù, cjol la mê anime». Po si pleà sui zenoi e al disè a fuart: «Signôr, no sta metiur in cont chest pecjât». E cun chestis peraulis, si indurmidì vie. / Ats 6,8-10; Ats 7,54-60
Vinars 26 Dicembar 2025
