Luche XVIII,31-43: Po al cjolè cun sè i Dodis e ur disè: «Ve che o lin sù a Jerusalem e si colmarà dut ce che al è stât scrit dai profetis a rivuart dal Fi dal om. Al sarà consegnât ai paians, al sarà svilanât, lu jemplaran di ofesis e i spudaran intor; e, dopo di vêlu flagjelât, lu coparan. Ma la tierce dì al resussitarà». Lôr però no capirin nuie di dut chest discors: il significât di chel fevelâ al restà scûr par lôr e no rivavin a capî nuie di nuie. Biel che si stavin svicinant a Jeric, ad ôr de strade al jere sentât un vuarp che al cirive la caritât. Sintint a passâ la fole, al domandà ce che al stave sucedint. I rispuinderin: «Al sta passant Jesù di Nazaret!». Alore lui al tacà a berlâ: «Jesù, fi di David, ve dûl di me!». Chei che a jerin denant i cridavin par fâlu tasê. Ma il vuarp al berlave inmò plui fuart: «Fi di David, ve dûl di me!». Alore Jesù si fermà e al ordenà che i menassin il vuarp. Cuant che al fo dongje, i domandà: «Ce vuelistu che ti fasi?». I rispuindè: «Signôr, fasimi viodi!». E Jesù i disè: «Viôt! La tô fede ti à salvât». Dal moment al tornà a viodi e si metè a lâ daûr di lui, ringraciant Diu. Ancje la int che e jere li, viodint il fat, e tacà a laudâ Diu.